Ao longo de varios anos desenvolvín diversas páxins webs para campañas de responsabilidade social de Casa Grande de Xanceda. Proxectos diferentes arredor do benestar animal, o medio ambiente, a educación e a mobilización social.
Aquí había unha liberdade de deseño difícil de atopar nunha web corporativa.
Cada campaña necesitaba a súa propia personalidade: textos enormes, fotografías a pantalla completa, movemento, elementos solapados e composicións pouco convencionais. Algunhas eran páxinas de campaña moi directas; outras incluían novas, galerías ou contidos enviados pola comunidade. Todo pensado principalmente para móbil e sen usar a creatividade como escusa para construír webs lentas.
Pero non todo era deseño. Algunhas campañas tiñan que recibir centos de fotografías ou vídeos de gran tamaño enviados polas persoas participantes. Desenvolvín sistemas personalizados para xestionar esas achegas e, nos casos necesarios, enviar automaticamente os vídeos a Google Drive no canto de saturar o servidor da web.
Inclúo estas campañas como un único proxecto porque resumen dúas partes do meu traballo que non sempre coinciden: liberdade para deseñar sen medo e capacidade técnica para conseguir que a idea funcione cando comezan a chegar participacións reais. Porque unha web pode ser moi bonita pero, se falla cando a xente participa, deixa de ser unha boa campaña e pasa a ser un problema.
