UA.gal é o portal do Proxecto de Aceptación Universal promovido por PuntoGal, coa participación de ICANN, geoTLD e outras entidades. A iniciativa defende unha idea tan básica como aínda pouco aplicada: que calquera dominio ou enderezo de correo funcione correctamente, independentemente da súa extensión, lingua ou alfabeto.
O reto era explicar un estándar técnico sen construír unha web que só entendesen especialistas. Había que ordenar documentación, ferramentas, achegas e contidos de actualidade, pero tamén adaptar a información a sectores moi diferentes: administracións, centros educativos, comercio electrónico, comunicación, cultura dixital, software libre ou videoxogos.
Encargueime da proposta de interface e de todo o desenvolvemento web, construído con ferramentas nativas de WordPress e unha estrutura baseada en bloques. O resultado é unha plataforma flexible, moi optimizada e preparada para medrar, na que os contidos, as listas de comprobación e os recursos técnicos se poden consultar de xeito sinxelo.
Inclúoo porque demostra que unha web institucional non ten por que ser lenta, ríxida nin aburrida. E porque Internet non é realmente aberta se só funciona ben para os dominios, alfabetos e usuarios de sempre.
