Cabanas Fisterra é un pequeno complexo de nove cabanas con vistas ao mar, terraza e jacuzzi situado entre a ría e a montaña, en Fisterra. O primeiro obxectivo foi renovar por completo a súa páxina web cunha interface máis atractiva, rápida e preparada para móbiles, capaz de transmitir mellor a experiencia do aloxamento.
O redeseño acompañouse dunha revisión da estrutura de títulos, dunha investigación básica de palabras clave e dun traballo de SEO na páxina orientado a buscas relacionadas con cabanas, escapadas románticas e aloxamentos en Fisterra. Pero a parte máis interesante do proxecto estaba na venda dos bonos regalo, que ata ese momento se xestionaba manualmente.
Desenvolvín unha tenda e un sistema a medida para configurar os diferentes bonos, personalizalos, envialos a outra persoa e controlar de maneira dinámica se estaban pagados. Tras completar a compra, o cliente pode recibir ou imprimir o bono sen que o equipo teña que preparalo manualmente cada vez.
Inclúoa porque representa ben o valor dunha automatización pequena, pero moi concreta. A web non só presenta mellor o aloxamento: elimina tarefas repetitivas, permite vender bonos a calquera hora e converte un proceso manual nunha nova vía de ingresos que funciona practicamente soa.
En colaboración con Javier Boquete, que se encargou de renovar a identidade corporativa da empresa.
