Arela Saúde reúne nunha mesma marca dúas actividades diferentes. Por unha banda, unha clínica de nutrición e fisioterapia na Coruña. Pola outra, servizos para empresas, restauración colectiva, hostalaría, formación e venda de materiais dixitais.
Por requisitos do rexistro sanitario, esas dúas áreas debían estar claramente separadas.
Non só nos contidos.
Dentro dunha mesma instalación conviven dúas estruturas case independentes: menús diferentes, pés de páxina propios, navegacións específicas e dúas identidades visuais. A área clínica emprega unha linguaxe máis próxima e unha gama laranxa; a parte empresarial e formativa adopta o verde e unha comunicación orientada a organizacións e profesionais.
Encargueime de deseñar e desenvolver esa arquitectura, mantendo a coherencia da marca sen facer pasar unha área polo que non era. Tamén se traballaron a investigación de palabras clave, a estrutura de títulos, o SEO técnico e a organización dun catálogo con cursos, libros electrónicos e outros recursos, ademais do blog da clínica.
Inclúoa porque é un bo exemplo de como resolver unha restrición real sen parcheala. Non se trataba de facer unha web partida pola metade, senón de conseguir que dúas webs diferentes convivisen con orde, fosen fáciles de manter e non confundisen a quen entra.
