Helena Murados é avogada en Lugo e presta asesoramento en dereito penal, laboral e de familia. A web debía presentar os seus servizos, explicar a súa forma de traballar e facilitar o contacto cunha profesional que aposta pola proximidade, a comunicación clara e o trato personalizado.
Non facía falta construír unha web xurídica cargada de formalismos.
Facía falta que unha persoa cun problema legal puidese entender rapidamente en que casos pode axudala Helena, coñecer a profesional que hai detrás do despacho e saber como contactar con ela. A interface adapta a súa identidade corporativa a unha estrutura limpa e bilingüe en galego e castelán, pensada para funcionar con claridade en móbil e cargar con rapidez.
Encargueime do deseño e desenvolvemento da web, así como da organización dos contidos e da estrutura de títulos orientada ao posicionamento local para servizos xurídicos en Lugo. Inclúoa porque representa ben o valor dunha web corporativa pequena cando está ben enfocada: non necesita aparentar ser un gran bufete, senón transmitir confianza, explicar os servizos e facer doado dar o primeiro paso.