Adiva do Eume é un proxecto familiar de alugueiro de vivendas para visitantes na comarca do Eume e nas Mariñas. A súa proposta combina aloxamento turístico coa recuperación de inmobles e espazos vinculados ao patrimonio local e ao Camiño Inglés.
A web funciona como un catálogo bilingüe dos diferentes aloxamentos. Cada inmoble conta cunha ficha propia na que se organizan fotografías, localización, capacidade, número de habitacións, servizos, normas e información práctica para a estadía. Unha estrutura dinámica permite manter separados os datos de cada vivenda e incorporar novas propiedades sen ter que reconstruír as páxinas desde cero.
Encargueime do deseño e desenvolvemento da web, creando o sistema de fichas e galerías para que cada aloxamento puidese presentarse coa súa propia personalidade dentro dunha estrutura común. Inclúoa porque representa ben unha necesidade habitual no sector turístico: ensinar varias opcións con claridade, facilitar a comparación e conseguir que as fotografías e os datos importantes estean onde o visitante espera atopalos.
