Agrilar é un centro de pedagoxía e psicomotricidade vivenciada en Ourense que acompaña nenos, nenas e familias desde unha mirada global do desenvolvemento. O seu traballo parte do corpo, do movemento e da emoción para abordar as dificultades desde a súa orixe, non só desde o síntoma.
A web debía explicar unha metodoloxía pouco coñecida sen resultar fría nin excesivamente técnica.
Por iso, a interface constrúese arredor de fondos suaves, formas orgánicas e unha combinación de cores pensada para transmitir calma, seguridade e crecemento. A estrutura presenta o centro, o equipo, a metodoloxía, os servizos de intervención terapéutica e un blog divulgativo, todo en galego e castelán.
Encargueime da proposta de cores e tipografías, do deseño e desenvolvemento da web e da estrutura técnica de SEO, incluída a xerarquía de títulos e a organización dos contidos. Inclúoa porque representa ben un proxecto no que a interface non pode ser allea ao servizo: a web tamén debía sentirse como un espazo seguro, cálido e profesional.
