Coquett é un centro de estética da Coruña que ofrece tratamentos faciais, corporais e experiencias de benestar. A web debía presentar esa variedade de servizos, pero tamén transmitir a sensación que define o propio centro: calma, coidado, atención persoal e un espazo pensado para facer unha pausa.
Neste caso, a interface tiña un peso especialmente importante.
As cores, as tipografías, as fotografías e o ritmo visual traballáronse para conseguir unha web elegante e próxima, capaz de acompañar o posicionamento da marca sen caer nun deseño frío ou excesivamente clínico. Os tratamentos están organizados por categorías e completados con explicacións, testemuños e unha proposta moi centrada na experiencia de cada persoa.
Encargueime do desenvolvemento web e da adaptación a WordPress da proposta de identidade deseñada por Sara, de Nanuc Design. Inclúoa porque representa ben unha web corporativa na que o deseño non é un adorno: forma parte da promesa do servizo e axuda a que a persoa entenda o tipo de atención que vai recibir antes mesmo de reservar.