A web do Concello de Cervantes reúne a información institucional, os servizos municipais e os recursos que a veciñanza necesita no seu día a día. Permite acceder á sede electrónica, ao taboleiro de anuncios, ao portal de transparencia, ás convocatorias de emprego, á documentación e ás diferentes vías de contacto co Concello.
Nunha web dunha institución, o deseño non debe competir coa información.
O traballo consistiu en ordenar os accesos principais, dar visibilidade aos trámites máis frecuentes e construír unha navegación clara para que calquera persoa poida atopar o que busca sen percorrer menús interminables. A actualidade e a axenda permiten, ademais, manter informada a veciñanza sobre novas, convocatorias e actividades.
A web reserva tamén un espazo importante ao turismo, con información sobre rutas, patrimonio, natureza, gastronomía e puntos de interese do municipio. Esta parte permite presentar Cervantes non só como administración, senón tamén como porta de entrada ao corazón dos Ancares.
Inclúoa porque representa ben o que debe ser unha web institucional: accesible, rápida e sen artificios innecesarios. O valor non está en sorprender a quen entra, senón en conseguir que unha persoa poida facer un trámite, descargar un documento, consultar unha actividade ou preparar unha visita sen perder tempo.