CuentaAI é unha aplicación creada por David Viña para xerar historias sociais con pictogramas e textos sinxelos. Está pensada para axudar a crianzas con TEA e outras necesidades a anticipar situacións cotiás, comprender que vai ocorrer e afrontar cada experiencia con maior seguridade.
A web tiña unha misión moi concreta: conseguir que as familias entendesen como funcionaba a ferramenta antes de rexistrarse.
O reto non estaba tanto no desenvolvemento técnico como na maneira de representar o proceso. Deseñamos unha secuencia animada que simula a escrita dunha petición (por exemplo, os pasos para ir ao dentista) e mostra como a aplicación a transforma nunha historia visual con texto e pictogramas. En poucos segundos, a propia web explica que hai que facer e que resultado se vai obter.
Encargueime do deseño da interface, cores e tipografías e do desenvolvemento web. Inclúoa porque demostra que unha web pequena tamén pode ter un reto de deseño: non abondaba con describir a aplicación. Había que facela comprensible, intuitiva e próxima sen obrigar a ninguén a ler un manual antes de probala.
