Ficar Aquí é unha plataforma de emprego e oportunidades no rural galego. Reúne ofertas de traballo, negocios en venda ou traspaso, propostas de relevo xeracional e oportunidades de colaboración que, doutro xeito, quedarían espalladas entre concellos, entidades e pequenas iniciativas locais.
O reto era converter información moi diferente nun sistema común.
Cada oportunidade funciona como unha ficha dinámica cos seus propios datos: empresa ou entidade, sector, localización, condicións, tipo de operación, forma de contacto e outros campos que aparecen ou desaparecen segundo o caso. As fichas poden consultarse mediante buscadores e filtros por provincia, comarca, concello, actividade ou tipo de oportunidade, ademais de situarse sobre un mapa interactivo.
Encargueime do desenvolvemento web a partir do deseño facilitado polo equipo de Ficar Aquí. Construín a arquitectura dos diferentes tipos de oportunidades, os modelos de ficha, os filtros, as buscas e a integración coa xeolocalización.
Inclúoa porque non é unha web que simplemente publica ofertas. É unha base de datos territorial preparada para ordenar información moi diversa e facer visible onde sucede. Nun proxecto que busca crear oportunidades no rural, poder atopalas tamén forma parte da solución.
