Incendios.gal é un proxecto propio e aberto que permite consultar e comunicar incendios ou incidencias relacionadas. A cidadanía pode sinalar lume visible, fume, estradas cortadas, medios de emerxencia ou outras situacións relevantes nun mapa común. Non substitúe os servizos oficiais: ante unha emerxencia, a propia web remite ao 112 ou ao 085.
O centro do proxecto é un mapa interactivo desenvolto a medida mediante PHP e JavaScript sobre OpenStreetMap. Desde un formulario preparado para móbil e ordenador, calquera persoa pode marcar directamente a localización, escoller o tipo de incidencia e engadir unha descrición, unha fotografía ou un vídeo. O aviso publícase xeolocalizado para que poida ser consultado polo resto da comunidade.
Encargueime da idea, do deseño e de toda a programación da plataforma. Inclúoa porque mostra unha parte do meu traballo que vai máis alá de adaptar WordPress: deseñar unha ferramenta cartográfica completa, resolver a xeolocalización e a subida de arquivos e conseguir que todo funcione de maneira rápida e sinxela desde o móbil.
Este é un proxecto no que participo personalmente. Podes atopar máis info na súa entrada da sección de proxectos.