María Alonso Seisdedos é tradutora e revisora editorial cunha longa traxectoria profesional. Traballa desde diferentes linguas cara ao galego e ao castelán e participou na tradución de obras de autoras e autores como Orhan Pamuk, James Joyce, Irene Solà ou Natalia Ginzburg.
A web debía ordenar e presentar unha carreira con moito que contar.
A estrutura reúne a súa biografía, os premios recibidos, os textos propios e un catálogo de obras traducidas. Cada libro dispón dunha ficha cos datos da obra orixinal, a editorial, o idioma, o ano de publicación e outros recoñecementos. Todo funciona en galego e castelán, facendo que a experiencia e os traballos realizados sexan o principal argumento de autoridade.
Encargueime do deseño e do desenvolvemento da web, cunha interface monocromática e en escala de grises que deixa o protagonismo á palabra, ás fotografías e ás cubertas dos libros. Inclúoa porque representa ben unha marca persoal cunha traxectoria sólida: non necesita prometer experiencia, senón organizala e facela visible.
