Casa Príncipe é un pequeno proxecto familiar de Navia de Suarna que produce mel nas montañas dos Ancares. A web debía presentar as diferentes opcións, facilitar o contacto e contar unha historia ligada ás abellas, ao territorio e ao legado familiar.
Non facía falta unha tenda enorme nin unha web cargada de seccións.
Facía falta transmitir por que este mel non podería saír de calquera outro lugar. Por iso, a web non fala só do produto: tamén pon en valor os cortíns, construcións tradicionais de pedra que protexían as colmeas e que forman parte dunha cultura abelleira practicamente desaparecida.
Encargueime da selección das cores, da proposta tipográfica, do deseño da interface e de todo o desenvolvemento da web en galego e castelán. Inclúoa porque demostra que un negocio pequeno non necesita aparentar ser máis grande do que é. Necesita unha identidade coidada, unha mensaxe clara e unha web capaz de facer que un bo produto local tamén se perciba como tal.