Mi Taller de Flores é un estudo de arte floral situado en Pontedeume, especializado en flores secas e preservadas. O proxecto ofrece ramos, coroas, decoración para celebracións, agasallos personalizados e obradoiros, cun estilo propio entre o romántico e o rústico.
A web debía trasladar ese coidado á pantalla.
A interface deseñouse cunha estética suave, visual e moi ligada ao produto, deixando que as fotografías, as cores e as texturas das composicións ocupasen o primeiro plano. A estrutura presenta os servizos, explica as diferenzas entre flor seca e preservada e facilita descubrir o traballo do estudo sen sobrecargar a navegación.
Desenvolvín tamén a tenda en liña, onde cada produto conta coa súa propia ficha, fotografías, medidas, indicacións de conservación, condicións de envío e compra directa. O catálogo permite vender coroas, caixas, vasos e outras composicións artesanais máis alá do establecemento físico.
Inclúoa porque representa ben un comercio electrónico no que o deseño forma parte da venda. Non abonda con colocar os produtos nunha grella: a web ten que transmitir o coidado, a sensibilidade e o carácter artesanal que fan que cada composición sexa especial.