Nova Escola Galega é un movemento asociativo que traballa desde 1983 pola renovación pedagóxica e pola galeguización lingüística e curricular do ensino. A web debía presentar a entidade, a súa organización e a súa actividade, pero tamén conservar e facer consultable unha enorme cantidade de coñecemento acumulado durante décadas.
O proxecto partía dunha web programada a medida había máis de dez anos.
Era unha estrutura ríxida, difícil de actualizar e con moi pouca capacidade para adaptarse ás necesidades actuais. O traballo consistiu en migrala a WordPress e reconstruír toda a información como contidos dinámicos: publicacións, actividades, novas, grupos de traballo e galerías históricas, cada un coa súa propia estrutura e preparado para seguir medrando.
A parte máis importante é o repositorio documental. Cada publicación dispón dunha ficha cos seus datos e arquivos descargables, e pode localizarse mediante buscas e filtros. Algunhas publicacións teñen, ademais, acceso restrinxido baixo usuario e contrasinal. As galerías poden ordenarse por ano e categoría, mentres que cada grupo de traballo reúne a súa presentación, actividade e contidos relacionados.
Inclúoa porque non foi un simple redeseño. Había que trasladar anos de actividade desde unha plataforma pechada, ordenar documentación moi diversa e construír unha ferramenta que a propia asociación puidese editar. A web deixou de ser un arquivo difícil de manter para converterse nun repositorio vivo, consultable e preparado para conservar o traballo futuro.
