Son de Lugo é unha tenda en liña que reúne pequenos produtores da provincia de Lugo para vender produto local e de proximidade directamente ao consumidor. Da montaña á costa, da horta ao leite, a plataforma permite mercar produtos de calidade a prezos xustos e sen intermediarios, tanto de maneira individual como mediante subscrición.
O reto principal foi migrar unha tenda xa existente de PrestaShop a WooCommerce, conservando produtos, pedidos e información previa, pero aproveitando o cambio para construír unha plataforma máis completa. A nova web é multidioma, en galego e castelán, incorpora área de usuario, listas de desexos, subscricións e distintos tipos de envío, incluído transporte en frío.
Tamén se desenvolveu unha estrutura dinámica que relaciona produtores e produtos. Cada produtor conta coa súa propia ficha e cos produtos asociados, de maneira que toda a información queda conectada internamente e é máis sinxela de manter. A isto súmanse a renovación dos correos transaccionais e a integración dos envíos cunha plataforma externa como DPD.
Encargueime do desenvolvemento e da migración técnica, prestando especial atención ao rendemento. Inclúoo porque representa ben o traballo que hai detrás dunha tenda en liña complexa cando todo funciona como debería: catálogo, produtores, subscricións, loxística e contidos conectados nunha plataforma rápida tanto en móbil como en escritorio.
