Suseia é unha cooperativa galega especializada en produción audiovisual e comunicación. Traballa en formatos televisivos, vídeos corporativos, campañas publicitarias, edición, posprodución e contratación de profesionais, cunha maneira de entender o sector ligada á cooperación, á ética empresarial e á sustentabilidade.
A web debía explicar esa variedade de servizos sen quitarlles protagonismo aos traballos.
Por iso, o portfolio ocupa unha parte central da estrutura. Cada proxecto permite combinar vídeo, texto e contexto para amosar campañas, pezas divulgativas, contidos culturais ou producións para institucións e empresas.
Encargueime do deseño e desenvolvemento da web en galego e castelán, organizando a información corporativa, os servizos e o arquivo de traballos dentro dunha interface clara e visual. Inclúoa porque representa ben o que necesita unha produtora audiovisual: unha web que non compita cos seus vídeos, senón que lles dea estrutura, contexto e un lugar onde demostrar o valor do traballo.
