Ancares Terras de Burón é a web dun xeodestino formado por catorce concellos do interior de Lugo. O portal pon en valor un territorio con tres Reservas da Biosfera, patrimonio natural, gastronomía, tradicións e diferentes propostas para coñecelo sen présa.
O reto era reunir moita información sen crear unha guía turística imposible de percorrer.
Cada concello dispón do seu propio espazo e a web organiza contidos dinámicos como a axenda, festas gastronómicas, feiras, mercados, rutas en bicicleta, percorridos temáticos, propostas de ecoturismo e artigos de actualidade. Ademais, integra mapas turísticos externos que permiten localizar rutas, monumentos, fervenzas, fragas, aloxamentos e outros puntos de interese desde móbil ou ordenador.
Desenvolvín a parte web en colaboración con Arela Marketing Sostible, que participou tamén na estratexia e na creación dos contidos. O meu traballo consistiu en construír a estrutura multilingüe, organizar os diferentes tipos de información e integrar os mapas dentro dunha navegación coherente.
Inclúoa porque unha web non pode limitarse a ensinar fotografías bonitas. Ten que axudar a decidir que visitar, que facer e como organizar a viaxe. E facelo sen reducir un territorio enorme a catro lugares de sempre.