As chaves da lingua é o proxecto persoal de Noemí García para aprender, mellorar e gozar do galego. Naceu como un blog con publicacións semanais sobre gramática, vocabulario, ortografía, literatura, tradicións ou lecer, pero co tempo foi medrando ata converterse nunha plataforma con recursos propios.
Hoxe non é só un lugar onde ler artigos.
O proxecto incorpora xogos e aplicacións como sopas de letras, encrucillados, o enforcado, o Tabú en galego, un xerador de nadaliñas personalizadas ou verbos.gal, un chatbot experimental especializado en conxugación verbal. Cada ferramenta ten a súa propia interface e está pensada para funcionar de maneira sinxela desde o móbil.
Encargueime de construír toda a base técnica: o blog, a estrutura dos contidos, a optimización para buscadores e dispositivos móbiles e o desenvolvemento a medida das diferentes aplicacións mediante PHP e JavaScript. A autoría dos artigos e dos materiais lingüísticos corresponde a Noemí.
Inclúoo porque amosa como un proxecto editorial pode evolucionar cando a tecnoloxía acompaña as ideas. As chaves da lingua supera as cen mil visitas únicas anuais e conta cunha newsletter de máis de tres mil persoas. Non só publica contido en galego: crea ferramentas para usalo, aprendelo e xogar con el.
Este é un proxecto no que participo personalmente. Podes atopar máis info na súa entrada da sección de proxectos.
