Orgullo Galego é a maior comunidade dixital en galego, con máis de medio millón de persoas seguidoras nas redes sociais. A súa web funciona como revista arredor da cultura, da lingua, da natureza e das tradicións galegas, cun arquivo propio de artigos e vídeos que non depende dos algoritmos das plataformas externas.
Pero a web tamén é unha parte central do negocio.
Desenvolvín a tenda en liña desde a que se venden libros, roupa, produtos propios e outros artigos vinculados coa identidade do proxecto. O traballo non consistiu só en instalar un catálogo: había que facer cómoda a navegación, facilitar a compra e integrar a parte comercial dentro dunha web editorial sen que unha anulase a outra.
Encargueime tamén da estratexia de captación dentro da propia web. A newsletter, que xa supera as 5.000 persoas subscritas, permite manter unha relación directa coa comunidade, distribuír os contidos e reducir a dependencia das redes sociais. A portada, os formularios, os recursos descargables e as diferentes chamadas á subscrición están pensados para transformar visitas puntuais en audiencia propia.
Inclúoa porque mostra unha web que cumpre varias funcións ao mesmo tempo: publica, vende e constrúe comunidade. Non é só o escaparate dixital dun proxecto con moitos seguidores. É unha infraestrutura propia que converte esa atención en relación, recorrencia e negocio.
Este é un proxecto no que participo personalmente. Podes atopar máis info na súa entrada da sección de proxectos.
