Pois si.
Volvín estudar.
Matriculeime no ciclo de Desenvolvemento de Aplicacións Web (xD). Despois de máis de oito anos dedicándome profesionalmente ao deseño e desenvolvemento web… pois vou estudar desenvolvemento de aplicacións web.
E supoño que a pregunta é bastante evidente:
«Pero se xa traballas disto, para que te matriculas?»
Pois mira, non o sei.
Ou, polo menos, non teño unha única resposta.
Un pouco de incerteza
Agora mesmo teño unha boa posición profesional e creo que o meu proxecto avanza de maneira sólida ano a ano.
Si, métolle moitas horas. Un esforzo de carallo… mais polo momento vai dando os seus froitos. Toquemos madeira!!
Polo tanto, non decidín estudar porque vaia deixar o meu traballo, porque as cousas vaian mal ou porque queira cambiar de sector.
Pero quen sabe onde estaremos dentro de dez, quince ou vinte anos.
E si, supoño que detrás desta decisión hai tamén certa incerteza sobre o futuro. Non unha preocupación inmediata nin un medo concreto. Simplemente a conciencia de que as cousas cambian, a tecnoloxía cambia e o mercado laboral tamén.
Levo anos traballando nisto e teño experiencia. Pero non teño unha titulación específica que acredite esa parte do meu traballo.
Pode que nunca a necesite.
De feito, estou case seguro de que nunca a necesitarei. Como nunca necesitei a que teño. Pódoche dicir, querido lector, que teño a frioleira de 0 títulos na casa. Nunca os fun recoller. Non me interesan. Non me importan.
Mais non o sei.
Se cadra algún día é preciso. Por iso decidín facelo agora.
O papel, pero tamén o que poida aprender
Sería absurdo matricularme pensando que xa sei todo o que me van ensinar.
E tamén sería absurdo pensar que oito anos de experiencia profesional non contan para nada porque non teña un título que os acompañe.
Nin unha cousa nin a outra.
Quero conseguir esa acreditación, si. Quero ter un papel que poida servirme no futuro se nalgún momento o preciso.
Pero tamén quero ver que podo aprender durante o ciclo, independentemente do que xa saiba pola miña experiencia.
Porque dedicarse profesionalmente a algo non significa que deixes de ter cousas que aprender. Máis ben ao contrario.
Formarse forma parte do traballo
Nunha profesión como a miña, a formación continua non é opcional.
WordPress cambia. A programación cambia. O márketing cambia. A intelixencia artificial está cambiando unha parte importante do que facemos. Aparecen ferramentas novas, cambian os procesos e cousas que hai uns anos funcionaban perfectamente hoxe poden quedar curtas.
Por iso nunca deixei de aprender sobre WordPress, márketing, programación ou intelixencia artificial.
O ciclo é outra maneira de seguir facéndoo.
Máis formal, máis estruturada e, se todo vai ben, cun título ao final.
A ver que pasa
Este ano teño sete materias e pedirei a convalidación de catro.
O obxectivo é bastante sinxelo: aprobar, aprender e intentar sacar boas notas.
Entendo que a algunhas persoas lles poida parecer unha decisión innecesaria. Que despois de tantos anos traballando disto un ciclo non me vai descubrir nada. Ou que a experiencia debería ser máis ca suficiente.
Pode ser.
Pero aí vou.
Non sei se acabará sendo unha decisión moi útil para o meu futuro profesional ou simplemente unha experiencia da que sacarei algunhas aprendizaxes. En calquera dos dous casos, creo que pagará a pena probalo.
Se vos parece interesante, xa irei contando como avanza.
E ao final do curso veremos se aprobei, que aprendín e se conseguín esas boas notas que agora digo que vou intentar sacar.
